کھنڈنی مانگنے والے دو نوجوانوں پر مقدمہ

ناندیڑ:۱۲؍اگست (نامہ نگار)ایک تاجر کے بلڈنگ کام کی شکایت بلدیہ میں دے کر اس تاجر سے ایک لاکھ روپئے کھنڈنی مانگنے والے دو نوجوانوں کے خلاف اتوارہ پولس اسٹیشن میں مقدمہ درج کیاگیا ہے ۔ پولس پریس نوٹ کے مطابق اتوارہ علاقہ کے بلڈنگ مٹیریل سپلائر مدثر نذر خان عرف ماجد نے پولس میں شکایت درج کرائی کہ ان کے تعمیری کام کے تعلق سے مذکورہ دو ملزمین نے بلدیہ میں تعمیری کام منہدم کرنے کی شکایت پیش کی تھی اور شکایت واپس لینے کیلئے ان سے ایک لاکھ روپئے کھنڈنی طلب کی تھی ۔ ملزم نمبر (۱) کھنڈنی کی آدھی رقم لیتے ہوئے پکڑا گیا جبکہ دوسرا ملزم



وہاں سے فرار ہوگیا ۔ اتوارہ پولس اسٹیشن میں دونوں ملزمین کے خلاف کھنڈنی مانگنے کا مقدمہ درج کیا گیا ہے ۔ واضح رہے کہ ناندیڑ شہر میں ان دنوں خودساختہ بھرشٹا چار نرمولن سمیتی کے عہدیداران ، مختلف سنگھٹنا کے ذمہ دار بتاکر کچھ نوجوان نئے تعمیری کاموں کی شکایت میونسپل کارپوریشن کے پاس تحریری طورپر پیش کررہے ہیں اور پھر بلڈنگ مالک سے بڑی رقم کا مطالبہ کررہے ہیں ۔ تعمیری کام کی جگہ پر پہنچ کر لوگوں کو بلیک میل کرنے کا نیا کاروبار کچھ دھوکہ بازوں نے شروع کیا ہے اور اس کے لئے میونسپل کارپوریشن میں شکایت پیش کرکے اس کا سہارا لیا جارہا ہے ۔